Þá er jólafríið komið og væntanlega einhverjir hvíldinni fegnir (en alveg örugglega ekki allir!). Æfingar munu hefjast skv. æfingatöflu mánudaginn 5. janúar. Séu einhverjir ekki sáttir við fríið skal auðvitað benda þeim á að fótbolta er hægt að iðka hvar sem er, hvenær sem er og næstum hvernig sem er. Smellið boltanum bara á tærnar og byrjið leikinn en verið bara ekki í stofunni, það er ekki vinsælt.

Stjórn Boltafélags Ísafjarðar óskar iðkendum sínum, foreldrum og velunnurum öllum gleðilegra jóla og farsældar á komandi ári með þökk fyrir allt skemmtilega starfið á líðandi ári. Sjáumst fersk og endurnærð á næsta ári og af enn meiri krafti.

Þá er uppröðunin komin á hreint. Við ákváðum að breyta aðeins fyrirkomulaginu á mótinu enda ljóst að Hólmvíkingar komast ekki þessa helgi og fækkar þar með leikjum nokkuð. Svo eru krakkarnir okkar út um allar trissur enda nálgast jól og erum við því með færri lið en venjulega. Með því að hagræða aðeins og fækka leikjum í völdum flokkum getum við því klárað mótið á laugardeginum. Flokkar eiga að mæta sem hér segir (ef þjálfarinn sagði annað, farið þið eftir því sem hann/hún sagði):

8. flokkur mætir kl. 8:30, hefur leik kl. 9:00
7. flokkur drengja og stúlkna og 6. flokkur stúlkna mætir kl. 8:50, hefur leik kl. 9:20
4. flokkur stúlkna mætir kl. 10:00, hefur leik kl. 10:30
4. flokkur drengja mætir kl. 10:30, hefur leik kl. 11:00
6. flokkur drengja og 5. flokkur stúlkna mætir kl. 12:30, hefur leik kl. 13:00
5. flokkur drengja mætir kl. 14:15, hefur leik kl. 14:45
3. flokkur karla mætir kl. 16:00, hefur leik kl. 16:40.

Móti lokið kl. 17:00

Nákvæm leikjatafla er komin inn undir liðnum "Gögn fyrir foreldra" á forsíðunni.

Eins og lýðum er ljóst hefur Emil Pálsson, leikmaður BÍ88, verið að æfa með 30 manna úrtaki með U-17 ára landsliði Íslands undanfarið. Hann var kallaður til æfinga um síðustu helgi og hefur nú verið hóað í hann á ný. Hann mun því æfa með liðinu nú um helgina 6. og 7. desember. Það er því ljóst að Emil kemur sterklega til greina í leikhóp liðsins.

En hann er ekki að fara einn í þetta skiptið því nú var Matthías Króknes Jóhannsson, leikmaður 3. flokks BÍ88, kallaður til æfinga með 60 manna úrtakshópi fyrir U-16 landsliðs Íslands. Það ætti ekki að koma neinum á óvart, Matthías er sterkur leikmaður og var gríðarlega gaman að horfa á spretti hans á vellinum síðasta sumar, þá sem leikmanns 4. flokks BÍ88. Hann sat síðan á bekknum hjá 2. flokki og kom við sögu í einhverjum leikjum. Þá kynntist hann aðeins bekkjarsetunni hjá meistaraflokki síðasta sumar en kom ekki við sögu í leikjum þeirra.

Við óskum Emil og Matthíasi til hamingju með árangurinn enda eru þeir valdir úr hópi nokkur hundruð stráka á landsvísu.

Boltafélag ísafjarðar, BÍ88, ætlar að bjóða öllum stelpum í 1.-6. bekk á æfingar einu sinni í viku í vetur, þeim að kostnaðarlausu! Stelpur í 5. og 6. bekk mega mæta á æfingar á mánudögum kl. 15:00 í íþróttahúsinu við Torfnes en stelpur í 1., 2., 3. og 4. bekk mega mæta á föstudögum kl. 14:00 í íþróttahúsinu við Austurveg. Ekki er skylda að mæta á aðrar æfingar félagsins og munið-þetta kostar ekki neitt!
Þjálfari er Birna Jónasdóttir og veitir hún allar upplýsingar í síma 869 4209 og birnajo@hotmail.com.

Haustmótið árlega verður haldið í íþróttahúsinu við Torfnes helgina 6.-7. desember nk. Munu 3.-8. flokkar drengja og stúlkna leika listir sínar með knöttinn og má búast við margmenni enda von á félögum okkar frá Bolungarvík, Flateyri, Suðureyri, Súðavík og Þingeyri. Reiknað er með að mótið hefjist kl. 9 báða dagana og að það standi til kl. 17 a.m.k. á laugardeginum og til kl. 15 á sunnudeginum. Veitingar verða seldar vægu verði á staðnum og auðvitað fá allir einhver lítil verðlaun fyrir þátttökuna og dugnaðinn á æfingum undanfarnar vikur.