Fréttir

Ársþing HSV á Suðureyri 22. maí 2025

Ársþing HSV 2025 var haldið fimmtudaginn 22. maí sl. og fór það fram í félagsheimilinu á Suðureyri. Sigurður Jón Hreinsson formaður setti þingið í tuttugasta og fimmta skiptið. Marinó Hákonarson var kosinn fyrsti þingforseti og Birna Hannesdóttir annar þingforseti. Gildir þingfulltrúar voru 31 talsins og þátttakendur í heild um 40 manns.

Daníel Jakobsson, fulltrúi frá framkvæmdastjórn ÍSÍ og Guðmunda Ólafsdóttir, fulltrúi frá stjórn UMFÍ ávörpuðu þingið og fluttu kveðjur frá stjórnum ÍSÍ og UMFÍ. Þá veitti Guðmunda Svövu Rán Valgeirsdóttur starfsmerki UMFÍ fyrir störf sín fyrir Stefni á Suðureyri um árabil.

Á þinginu var farið yfir hefðbundin fundarstörf, skýrslu stjórnar, afgreiðslu reikninga og fjárhagsáætlunar, og afgreiðslu tillaga sem voru 13 talsins. Meðal annars var ákveðið að búa til starfshóp um endurskoðun laga HSV og munu Ásgerður Þorleifsdóttir, Guðfinna Hreiðarsdóttir og Marinó Hákonarson skipa þann hóp. Þingið þótti með lengra móti en það hófst kl. 17 og lauk um kl. 22.30.

Uppstillingarnefnd hafði starfað í aðdraganda þingsins og var nokkuð um framboð í stjórn. Kosið var í formannssætið og hlaut Sigurður Gunnar Þorsteinsson meirihluta atkvæða. Magnús Þór Bjarnason og Hafsteinn Már Andersen voru á síðasta þingi kosnir til tveggja ára og sitja því áfram í stjórn. Uppstillingarnefnd lagði til þau Kristinn Ísak Arnarsson og Guðbjörgu Ebbu Högnadóttur í aðalstjórn til tveggja ára og í varastjórn þau Heiðrúnu Tryggvadóttur, Höllu Signýju Kristjánsdóttur og Árna Freyr Elíasson. Tillögur uppstillingarnefndar voru samþykktar með lófataki.

Stjórn HSV er þá þannig skipuð næsta árið:
Sigurður Gunnar Þorsteinsson – formaður
Hafsteinn Már Andersen
Magnús Þór Bjarnason
Kristinn Ísak Arnarsson
Guðbjörg Ebba Högnadóttir
Varastjórn:
Halla Signý Kristjánsdóttir
Heiðrún Tryggvadóttir
Árni Freyr Elíasson

Fráfarandi formanni og stjórn HSV er jafnframt þakkað fyrir sín störf á liðnu ári.

Tveir einstaklingar hlutu heiðursviðurkenningar HSV. Einar Halldórsson fékk silfurmerki HSV fyrir ómetanlegt framlag hans til Harðar og íþróttahreyfingarinnar í heild, og Halldór Karl Valsson hlaut silfurmerki HSV fyrir hönd Vestra og störf sín fyrir ýmis íþróttafélög um árabil.

Suðureyri við Súgandafjörð. mynd/westfjords.is

25. Héraðsþings HSV verður haldið fimmtudaginn 22. maí nk.  

Þingið hefst kl. 17:00. og verður haldið í Félagsheimilinu á Suðureyri.

Fyrir liggur að breytingar verða á stjórn sambandsins. Kjósa þarf inn tvo nýja aðalmenn í stjórn auk þriggja varamanna.  Þeir sem eru áhugasamir um að koma í stjórn HSV mega hafa samband með tölvupósti í hsv@hsv.is til að fá frekari upplýsingar eða heyra í Antoni Helga, tengilið uppstillingarnefndar í síma 845 3151.

Ársskýrsla HSV er kominn á heimasíðu HSV, en í henni má finna býsna margt um íþróttalíf á starfssvæði HSV.

HSV auglýsir eftir umsóknum í Styrktarsjóð þjálfara. Samkvæmt reglugerð sjóðsins er honum ætlað að auka þekkingu og færni þjálfara og með því móti auka gæði þjálfunar og efla íþróttastarf á starfssvæði héraðssambandsins.

Umsóknarfrestur er til og með 10. Febrúar.

Taka þarf fram hvort sótt er um styrk vegna námskeiða sem þjálfarar sóttu á árinu 2024, eða vegna fyrirhugaðra námskeiða á árinu 2025.

Í umsókn þarf að koma fram helstu upplýsingar um þjálfarann og/eða verkefnið sem sótt er um styrk fyrir. Umsóknum skal skilað á netfangið umsókn@hsv.is merkt Þjálfarasjóður

Reglugerð Þjálfarasjóðs HSV má finna á heimasíðu HSV.

Þá hefur jafnframt verið opnað fyrir umsóknir í Búnaðarsjóð HSV. Samkvæmt reglugerð sjóðsins er hann hugsaður til að styrkja kaup á nauðsynlegum búnaði fyrir íþróttafélög HSV. Styrkveitingum er ætlað að auka gæði þjálfunar og efla íþróttastarf í sveitarfélaginu.

Umsóknarfrestur er til og með 10. Febrúar.

Taka þarf fram hvort sótt er um styrk vegna búnaðar sem keyptur var á árinu 2024, eða vegna fyrirhugaðra búnaðarkaupa á árinu 2025.

Í umsókn þarf að koma fram helstu upplýsingar um búnaðinn og/eða verkefnið sem sótt er um styrk fyrir. Umsóknum skal skilað á netfangið umsókn@hsv.is merkt Búnaðarasjóður

Reglugerð búnaðarsjóðs HSV má finna á heimasíðu HSV.

Vegna fjölda fyrirspurna um skráningu iðkenda í hin ýmsu íþróttafélög vill stjórn HSV koma eftirfarandi á framfæri: 

Þær skráningar sem HSV og ÍSÍ hafa aðgang að í dag, eru skráningar fyrir árið 2023 og segja því ekkert um það í hvaða félag fyrirspyrjandi eða afkomendur hans eru skráðir í í dag.  HSV eða ÍSÍ get ekki farið inn í skráningar félaga til að afskrá iðkendur, það verður alltaf að gerast í gegnum viðkomandi íþróttafélag.  Allar stærstu íþróttagreinarnar innan HSV eru í dag farin að nota Sportabler og sé iðkand skráður þar ætti sá hinn sami eða forráðamaður hans að sjá skráninguna í gegnum sinn aðgang.

Þar sem HSV hefur ekki starfsmann til að sinna þessum verkefnum, höfum við fengið starfsmenn svæðisstöðva UMFÍ & ÍSÍ á Vestfjörðum til liðs við okkur. Þeir sem vilja fá þessar upplýsingar geta sent tölvupóst á þær Birnu eða Ebbu:

birna@siu.is

ebba@siu.is

Þær munu gera sitt besta til að svara öllum fyrirspurnum.

Þá er það jafnframt mikilvægt, til að þessi vinna nýtist íþróttahreifingunni sem best að fólk gefi greinargóðar upplýsingar til þeirra um það í hvaða íþróttafélög viðkomandi einstaklingar eiga með réttu að vera skráðir í.

Opnað hefur verið fyrir umsóknir í Afrekssjóð HSV.

Samkvæmt reglugerð Afrekssjóðs HSV er markmið sjóðsins að styrkja unga og efnilega íþróttamenn með því að gera eins árs samning við viðkomandi (8. grein) og mun sá samningur gilda fyrir árið 2025.

Einnig er heimilt að úthluta einstaka styrkjum til þeirra íþróttamanna sem ekki falla undir skilyrði til samnings (9. grein) og eru þeir styrkir veittir á grundvelli landsliðsverkefna á árinu 2024.

3. grein Eingöngu iðkendur aðildarfélaga HSV, sem stunda íþróttir sem viðurkenndar eru af Íþrótta- og Ólympíusambandi Íslands (ÍSÍ), geta sótt um styrk úr sjóðnum.

8. grein Meginmarkmið sjóðsins er að styrkja unga og efnilega íþróttamenn sem líklegir eru til að verða afreksmenn í framtíðinni. Sjóðurinn skal ná því markmiði með því að gera eins árs samning við viðkomandi.

9. grein Heimilt er að úthluta úr Afrekssjóðnum einu sinni á ári til þeirra íþróttamanna sem ekki falla undir skilyrði til langtímasamnings.

Umsóknarferlið er eins hvort sem sótt er um að gera samning eða fá einstaka styrki, umsækjandi merkir við hvoru hann sækist eftir.

Umsækjandi sem óskar eftir samningi en fær ekki, mun sjálfkrafa færast yfir í hóp þeirra sem sækja um einstaka styrki.

Umsóknarferlið fer fram í gengum umsóknarform afrekssjóðs HSV.

Umsóknarfrestur er til og með 26. janúar 2025